Selah / Hebrew Bible
Psalms 101
Read Psalms 101 in Hebrew. Open any verse for its aligned translations, words, and study layers.
- לְדָוִ֗ד מִ֫זְמ֥וֹר חֶֽסֶד וּמִשְׁפָּ֥ט אָשִׁ֑ירָה לְךָ֖ יְהוָ֣ה אֲזַמֵּֽרָה
- אַשְׂכִּ֤ילָה בְּדֶ֬רֶךְ תָּמִ֗ים מָ֭תַי תָּב֣וֹא אֵלָ֑י אֶתְהַלֵּ֥ךְ בְּתָם לְ֝בָבִ֗י בְּקֶ֣רֶב בֵּיתִֽי
- לֹֽא אָשִׁ֨ית לְנֶ֥גֶד עֵינַ֗י דְּֽבַר בְּלִ֫יָּ֥עַל עֲשֹֽׂה סֵטִ֥ים שָׂנֵ֑אתִי לֹ֖א יִדְבַּ֣ק בִּֽי
- לֵבָ֣ב עִ֭קֵּשׁ יָס֣וּר מִמֶּ֑נִּי רָ֝֗ע לֹ֣א אֵדָֽע
- מלושני בַסֵּ֨תֶר רֵעֵהוּ֮ אוֹת֪וֹ אַ֫צְמִ֥ית גְּֽבַהּ עֵ֭ינַיִם וּרְחַ֣ב לֵבָ֑ב אֹ֝ת֗וֹ לֹ֣א אוּכָֽל
- עֵינַ֤י בְּנֶֽאֶמְנֵי אֶרֶץ֮ לָשֶׁ֪בֶת עִמָּ֫דִ֥י הֹ֭לֵךְ בְּדֶ֣רֶךְ תָּמִ֑ים ה֝֗וּא יְשָׁרְתֵֽנִי
- לֹֽא יֵשֵׁ֨ב בְּקֶ֥רֶב בֵּיתִי֮ עֹשֵׂ֪ה רְמִ֫יָּ֥ה דֹּבֵ֥ר שְׁקָרִ֑ים לֹֽא יִ֝כּ֗וֹן לְנֶ֣גֶד עֵינָֽי
- לַבְּקָרִ֗ים אַצְמִ֥ית כָּל רִשְׁעֵי אָ֑רֶץ לְהַכְרִ֥ית מֵֽעִיר יְ֝הוָ֗ה כָּל פֹּ֥עֲלֵי אָֽוֶן