Selah / Hebrew Bible
Psalms 8
Read Psalms 8 in Hebrew. Open any verse for its aligned translations, words, and study layers.
- לַמְנַצֵּ֥חַ עַֽל הַגִּתִּ֗ית מִזְמ֥וֹר לְדָוִֽד
- יְהוָ֤ה אֲדֹנֵ֗ינוּ מָֽה אַדִּ֣יר שִׁ֭מְךָ בְּכָל הָאָ֑רֶץ אֲשֶׁ֥ר תְּנָ֥ה ה֝וֹדְךָ֗ עַל הַשָּׁמָֽיִם
- מִפִּ֤י עֽוֹלְלִ֨ים וְֽיֹנְקִים֮ יִסַּ֪דְתָּ֫ עֹ֥ז לְמַ֥עַן צוֹרְרֶ֑יךָ לְהַשְׁבִּ֥ית א֝וֹיֵ֗ב וּמִתְנַקֵּֽם
- כִּֽי אֶרְאֶ֣ה שָׁ֭מֶיךָ מַעֲשֵׂ֣י אֶצְבְּעֹתֶ֑יךָ יָרֵ֥חַ וְ֝כוֹכָבִ֗ים אֲשֶׁ֣ר כּוֹנָֽנְתָּה
- מָֽה אֱנ֥וֹשׁ כִּֽי תִזְכְּרֶ֑נּוּ וּבֶן אָ֝דָ֗ם כִּ֣י תִפְקְדֶֽנּוּ
- וַתְּחַסְּרֵ֣הוּ מְּ֭עַט מֵאֱלֹהִ֑ים וְכָב֖וֹד וְהָדָ֣ר תְּעַטְּרֵֽהוּ
- תַּ֭מְשִׁילֵהוּ בְּמַעֲשֵׂ֣י יָדֶ֑יךָ כֹּ֝ל שַׁ֣תָּה תַֽחַת רַגְלָֽיו
- צֹנֶ֣ה וַאֲלָפִ֣ים כֻּלָּ֑ם וְ֝גַ֗ם בַּהֲמ֥וֹת שָׂדָֽי
- צִפּ֣וֹר שָׁ֭מַיִם וּדְגֵ֣י הַיָּ֑ם עֹ֝בֵ֗ר אָרְח֥וֹת יַמִּֽים
- יְהוָ֥ה אֲדֹנֵ֑ינוּ מָֽה אַדִּ֥יר שִׁ֝מְךָ֗ בְּכָל הָאָֽרֶץ